நாட்டு பாதுகாப்பைச் செய்துகொள்ளாது ஆட்சிசெய்பவர் அஞ்சி அழிந்து போவார்.

பொருட்பால் -

 அரசியல் - 

வெருவந்தசெய்யாமை

குறள் 561 முதல  570 வரை

தக்காங்கு நாடித் தலைச்செல்லா வண்ணத்தால்

ஒத்தாங்கு ஒறுப்பது வேந்து  குறள் # 561

குற்றத்தை நடுநிலையோடு ஆராய்ந்து மீண்டும் அக்குற்றத்தைச் செய்யாதபடி

குற்றத்திற்கு ஏற்ப தண்டனை தருவதே நல்ல அரசு.    பாமரன் பொருள்

கடிதோச்சி மெல்ல எறிகநெடிதாக்கம்

நீங்காமை வேண்டு பவர்   குறள் # 562

கடுமையாக தண்டிப்பதுபோல தொடங்கி மென்மையாக தண்டிப்பீர் நெடுங்காலம்

மேன்மை நீங்காமல் இருக்க விரும்புபவர்.        பாமரன் பொருள்

வெருவந்த செய்தொழுகும் வெங்கோல னாயின்

ஒருவந்தம் ஒல்லைக் கெடும்   குறள் # 563

மக்கள் அஞ்சும்படி கொடுமைகள் செய்யும் கொடுங்கோல் ஆட்சியானால்

உறுதியாக விரைவில் அழியும்.       பாமரன் பொருள்

இறைகடியன் என்றுரைக்கும் இன்னாச் சொல்வேந்தன்

உறைகடுகி ஒல்லைக் கெடும்   குறள்  # 564

ஆள்பவர் கொடியவர் என்று மக்களால் சொல்லப் படும்கொடிய அரசு

ஆயுள் குறைந்து விரைவில் அழியும்.     பாமரன் பொருள்

அருஞ்செவ்வி இன்னா முகத்தான் பெருஞ்செல்வம்

பேஏய்கண் டன்னது உடைத்து  குறள் # 565

எளிதில் காணமுடியாத கடுகடுத்த முகத்தை உடையவரின் பெருஞ்செல்வம்

பேய் காத்திருப்பது போன்றது ஆகும்.           பாமரன் பொருள்

கடுஞ்சொல்லன் கண்ணிலன் ஆயின் நெடுஞ்செல்வம்

நீடின்றி ஆங்கே கெடும்   குறள்   # 566

கடுஞ்சொல் பேசுபவனாக கருணையில்லாதவராக இருந்தால் வளமான ஆட்சி

நீடிக்காமல் விரைவில் அழியும்.       பாமரன் பொருள்

கடுமொழியும் கையிகந்த தண்டமும் வேந்தன்

அடுமுரண் தேய்க்கும் அரம்.    குறள்  # 567

கடுஞ்சொல்லும் முறையற்ற தண்டனையும் ஆள்பவரின்

பகைவரை வெல்லும் வலிமையைக் குறைக்கும் கருவி..     பாமரன் பொருள் 

இனத்தாற்றி எண்ணாத வேந்தன் சினத்தாற்றிச்

சீறிற் சிறுகும் திரு.   குறள் @ 568

உடனுள்ளவர்களுடன் கலந்துஎண்ணாத ஆள்பவர் சினம் கொண்டு

சீறினால் செல்வம் நாளும் குறையும்.     பாமரன் பொருள்

செருவந்த போழ்திற் சிறைசெய்யா வேந்தன்

வெருவந்து வெய்து கெடும்  குறள்  # 569

போர்வரும்போது தேவையான பாதுகாப்பைச் செய்துகொள்ளா ஆட்சியர்

அஞ்சி அழிந்து போவார்.        பாமரன் பொருள்

கல்லார்ப் பிணிக்கும் கடுங்கோல் அதுவல்லது

இல்லை நிலக்குப் பொறை   குறள்  # 570

கல்லாதவர்களைத் துணையாகக் கொள்ளும் கொடுங்கோல் ஆட்சியர்

நிலத்துக்குப் பெருஞ் சுமை.      பாமரன் பொருள்